Një marsh në shenj solidarizimi me qytetarët palestinez është mbajtur sot në sheshet e Prishtinës nga Aktivistët e Kolektivit për Mendim dhe Veprim Feminist.

Aktivistët kanë kërkuar nga Qeveria që të mos pozicionohet në favor të Izraelit, duke e akuzuar këtë të fundit për gjenocid dhe për transformimin e Gazës në një varrezë të madhe në masë, raporton Arbresh.info.

“50,000 mijë gra shtatzëna jetojnë nën bombardime”, “Liri për Palestinën”, “Na lumi deri tek deti, Palestina do të jetë e lirë”, ishin disa nga pankartat qe aktivistët mbanin në duar.

“Nëpërmjet këtij marshimi, ne nuk synojmë bashkëpunimin me Hamasin dhe dënojmë sulmet ndaj çdo qytetari të pafajshëm. Është e papranueshme që Kosova, edhe pas dy dekadash nga konflikti i saj, të mbështetë një entitet agresiv”, u tha në protestë.

Lufta mes Izraelit dhe Hamasit nisi më 7 tetor, pasi grupi ekstremist sulmoi jugun e Izraelit, duke vrarë afër 1,200 persona dhe duke rrëmbyer afër 240 të tjerë.

Izraeli është kundërpërgjigjur duke rrethuar Gazën – ku jetojnë 2.3 milionë palestinezë – dhe duke kryer sulme të pareshtura ajrore, por edhe tokësore.

Si pasojë e luftimeve, në Gazë janë vrarë mbi 11.000 persona, kanë bërë të ditur autoritetet shëndetësore atje.

Izraeli është zotuar se do ta shkatërrojë Hamasin, që udhëheq me Gazën që nga viti 2007.